話說，羊羊開始了幼兒低B班生活後唔到一星期已經開始肚痾，接腫而來的係未夠一個月已經發燒流鼻水，我曾經以為母乳寶寶係無咁易病，因為羊羊豬0向2歲半返低B班前確是極少病，幾乎少於5次發燒，其中兩次出玫瑰疹，一次手足口，手足口0個次更奇妙地只係兩日搞掂，口入面只生兩粒水泡，兒科醫生初時仲警我佢應該兩日後口入面會出現好多水泡，然後食唔到野，入院吊鹽水，好彩好感恩(應該係非常感恩)我當時d媽媽奶夠力，幫佢好快打完場杖，其實媽媽奶真係好野黎，新手奶媽們如果你呢刻好辛苦，真係好想話你知，一切都係值得，因為羊羊頭2年半有母乳陪伴成長ge日子，確實係無咩大病，咳果d更少，痰就幾乎未出現過。所以當佢上左低B班後第一次發燒，然後勁流鼻水，再勁多痰同咳，我係好騰雞，以為超嚴重，醫生又話燒左3日唔退又咁咳係氣管炎，一定要食抗生素，果一刻，好悲，但見個仔咁辛苦，無計，照食。
故事延續落去，我諗各有經驗的 SUPER MOM 都估到，羊羊過無耐又發燒，又係燒下停下，然後醫生又話氣管炎，再落重藥，抗生素。好唔好彩，好快第三次氣管炎又出現，我今次真係唔順氣，喂~兩個月來3次發燒，3次氣管炎，4個CYCLES抗生素，醫生仲想開埋青蛙仔比佢，我唔甘心我明明用我D人奶比左咁多抗體佢，咁快又一鋪清袋??? 仲有，羊羊食左抗生素後性情大變，甚至撞頭埋梳化，然後仲打婆婆，佢性情之前不嬲都好穩定，而且佢竟然對抗生素出現左敏感，全面全身出粒粒，再加上佢食咁多西藥後胃口全失，由16.5kg跌到12.5kg，我每星期見我奶奶佢地屋企人就開始好大壓力，話成日病，搞到咁，唔好比佢返學。睇見咁，我做人阿媽其實都好心痛GA !!!!但佢係唔可能一世都唔返學ga ma.......我心諗 "唔得! 我要改變呢件事!!!!!"，
抗生素後出粒粒敏感，搽哂藥膏
得返12.5kg的日子- 呢日去影特區護照相,所以本特區護照時刻提住我佢曾經係幾瘦幾弱
於是，我開始研究病呢回事，睇到一本書話，原來一個小朋友要去完善一個自我免疫系統，在6歲之前係要經過至少66次感染。有D感染係佢自己本身ge免疫系統可以搞掂唔發病，有d係搞唔掂要發出黎令身體產生更多抗體以備將來需要，一個人免疫系統的高峰期應該係20至30歲，然後亦開始再下降。睇到呢度，我開始明白一件事，小朋友病係一個必然，既然係咁我就係要搵辦法幫羊羊加強自我免疫系統，提高自癒能力。下下靠抗生素打杖，就等於幫身體養個公主病出黎，咩都要人幫，飯來張口咁。咁當然，要明白一點好重要，自癒能力並唔係一日就訓練到出黎，但係經過5 個月來ge訓練，我敢話，羊羊豬係進步左好多。
訓練自癒能力
至於我用咩方法去訓練羊羊ge自癒能力? 我係用精油，中藥，西草藥，營養保健劑。
但SUPERMOM們，請停一停靜靜觀察一下你孩子身體究竟真正有咩唔舒服，再用天然方法去舒緩症狀。
羊羊3歲半，語言表達身體有咩唔舒服時依然係有限，好多時要引導一下先明白到佢真正咩唔舒服，例如喉嚨痛，肚痛，有d時候係要佢徵狀出來先可以明白佢有咩事。例如剛過去的星期日, 明明食飯時無LA LA好眼訓又坐唔安食唔落，摸下去有少少燒，又係咁要我抱佢，都知佢係想嘔。因為佢次次嘔都好想我抱，但問佢係唔係想嘔，佢會答我唔係，點知，搭車回家途中，佢嘔到我一身都係，咁我先就肯定係腸胃有感染。所以SUPER MOM 們真係要夠細心去觀察孩子，特別係年紀較細未識表達ge小朋友。咁當然流鼻水，咳果D係好容易觀察到。
病，係依然要睇醫生，睇下有無d我地就咁睇唔到ge問題，例如，中耳炎，喉嚨發炎，盲腸炎之類。確定源頭先可以對症下油或睇中醫或者有d係必須做外科手術。我並唔係反對西醫的，每種醫學派別都有自己ge長處。首先，我認為西醫長處係在於斷症，中醫長處就在於調理同排毒，至於精油，則是可以更有效地去舒緩病徵而無副作用。
用天然方法ge日子有功，自癒能力便會相應提高，每次病ge時間會逐漸縮短。以前羊羊豬要食10劑中藥先好返，而家用精油加中藥後好多時都可以5,6 劑中藥已經搞掂，最近上星期果次燒同嘔，更加係連中醫都無睇，因為果日係星期日中醫叔叔唔開。而退燒藥，已經有半年無掂過，西藥就已經有7, 8個月無用過。呢個收穫係好鼓舞 ! 我亦為佢身體免疫系統ge"升呢"感到非常高興，因為每一場杖都係佢靠自己去打嬴。
注意，我唔係話佢呢咁多個月無病過，各位SUPER MOM 請記住"小朋友係需要至少66次感染先可以完善一個自我免疫系統!!!" 我老公成日講笑，問我有無數下羊羊病左幾多次，夠數未? 哈哈~
經過5個月，終於上返去16kg, 我真係好感動
** 未經作者書面許可不許轉載、使用或翻印
免責聲明：以上陳述與產品並非專用於診斷、治療、治癒或預防疾病。文章資料僅供參考之用，不等同醫生意見。有關醫療問題及家居衛生習慣，請諮詢你的醫生。我們不會就任何陳述、使用或誤用承擔任何責任。
